Боже Великий, дивный, неисповедимою благостию и богатым промыслом управляя всяческая, Его же премудрыми, но неиспытанными судьбами разнообразный пределы жизнь и сожительство человеческое преемлет! Приклони ухо Твое с высоты Святыя твоея и приими от нас смиренных и недостойных раб Твоих (имена), сердцем и устны ныне возносимыя Тебе моления наша благоприятны, яко кадило благовонное, и ниспосли всегда яко щедр, рабом Твоим (имена) богатыя милости и щедроты Твоя.
Благослови благое намерение совета их и в совершении его произведи; сохрани их в мире, единомыслии и любви; ниспосли им Ангела своего хранителя, наставляюща, заступающа и невредимо соблюдающа их от всякого злаго обстояния; умножи лета живота их в нерушимом здравии и непременяемом благополучии.
О, Премилосердый Господи, Боже, щедрот и Отче всякия утехи! Не отврати лица Твоего от нас и не посрами нас в уповании нашем: уповающе на Тя, молимся Тебе и молящеся, на щедроты Твоя уповаем, Ты прошения подаеши и дарования утверждавши и всяческое деяние благо и всяк дар совершен свыше есть, сходяй от Тебе Отца Светов и Тебе славу возсылаем со Единородным Твоим Сыном, и всесвятым и благим и животворящим Твоим Духом, ныне и присно, и во веки веков. Аминь.